Hedikwatar tsaro ta ƙasa (DHQ) ta bayyana cewa ƴan ta’addan Boko Haram da ISWAP sun fara amfani da jirage marasa matuka wajen kai hari kan sojoji. Wannan sabon salo na kai hare-hare ya jawo hankalin jama’a, wanda hakan ya sa DHQ ta fito da sanarwa don kwantar da hankalin ‘yan Najeriya.
Manjo Janar Edward Buba, daraktan kula da harkokin yada labarai na DHQ, ya bayyana a taron manema labarai cewa, “Jiragen da ƴan ta’addan ke amfani da su ba na soja ba ne, don haka babu buƙatar a firgita.” Ya ƙara da cewa, waɗannan jirage ba ƙarfin soji bane, suna da ƙananan kayan aiki, kuma ba su da tasiri wajen kai hari.
Buba ya kwatanta jirage marasa matuka da “kayan wasa” da ƴan ta’adda ke amfani da su don muzgunawa sojoji, amma ba domin kai musu hari da gaske. “Amfani da jirage marasa matuka a fagen daga ba sabon abu ba ne,” in ji shi, yana mai cewa wannan yana faruwa a wasu kasashen duniya kamar Ukraine da Isra’ila.
Duk da haka, DHQ ta yi kira ga ‘yan Najeriya da su kasance a kan tsaro, amma kuma su guji fargaba. Manjo Janar Buba ya tabbatar da cewa dakarun sojin Najeriya na ci gaba da yaki da ƴan ta’adda da masu tayar da ƙayar baya a fadin ƙasar.
A wani labarin, dakarun sojin Najeriya sun samu nasarar cafke wani ɗan ta’addan Boko Haram a jihar Taraba, wanda hakan ya nuna cewa dakarun suna aiki tukuru wajen tabbatar da tsaro a ƙasar.
Hakan ya jawo karin hankali game da muhimmancin haɗin gwiwa tsakanin jami’an tsaro da al’umma don magance matsalar ta’addanci da kuma tabbatar da zaman lafiya a Najeriya.