Rundunar ‘Yan Sandan Jihar Kano ta fitar da sanarwa mai muhimmanci ga al’ummar Musulmi a lokacin da ake shirin fara azumin watan Ramadan. Sanarwar ta zo ne a cikin wani yunkuri na tabbatar da cewa an dauki matakan tsaro na musamman don gudanar da azumi cikin kwanciyar hankali da lumana.
Kakakin rundunar, SP Abdullahi Haruna Kiyawa, ya bayyana cewa an yi tsare-tsare na musamman don kare al’umma daga duk wani yiwuwar hadari na tsaro. A cikin sanarwar, an shawarci jama’a da su guji daukar kayan da ba su da muhimmanci yayin halartar sallar Tarawih, tare da kula da muhalli da bayar da rahoto kan duk wani abu mai zargi.
Rundunar ta kuma gargadi masu ababen hawa da su bi ka’idojin hanya, tare da hana yara kanana da wadanda ba su da lasisi tukin mota, babur da Keke Napep. An bukaci iyaye da masu kula da yara su tabbatar suna tare da manya yayin azumi don gujewa bacewa ko hadurra.
Haka zalika, an haramta amfani da abubuwan fashewa kamar bangers da knockouts, kuma duk wani taron da ba a nemi izini ba an hana shi. Rundunar ta jaddada cewa duk wanda aka samu yana aikata laifuffuka a lokacin wannan wata mai alfarma, za a dauki mataki mai tsauri a kansa bisa tanadin doka.
An bukaci jama’a su ci gaba da bayar da hadin kai ga hukumomin tsaro, ciki har da FRSC da Hisbah, domin tabbatar da zaman lafiya a wannan lokaci mai muhimmanci ga Musulmi.