Rundunar ƴan sandan jihar Katsina ta yi nasarar cafke wani ma’aikacin banki da ake zargi da satar kuɗaɗe har Naira miliyan 18 daga asusun wani kwastoma. Wannan mataki na yan sanda ya biyo bayan korafi da Okojie Herbert, wanda aka yi wa satar, ya shigar.
Kakakin rundunar, ASP Abubakar Sadiq Aliyu, ya bayyana cewa wanda ake zargin, wanda mataimakin jami’in ayyuka ne a bankin, ya haɗa baki da wani abokin aikinsa mai suna David Mesioye, wanda har yanzu ya tsere. An zargi ma’aikatan biyu da satar kuɗi ta hanyar ATM.
A cewar ASP Aliyu, an gudanar da bincike wanda ya nuna cewa wanda ake zargin ya amsa laifin da ake tuhumarsa. An ƙwato kuɗi N10,180,000 daga asusun ajiyarsa na banki daban-daban, tare da tsabar kuɗi N366,900 da sauran kayayyaki.
Yan sanda sun bayyana cewa suna ci gaba da bincike domin gano inda David Mesioye ya tafi da kuma tabbatar da cewa an hukunta wadanda suka aikata wannan laifi. Za a gurfanar da wanda aka kama a gaban kotu bayan kammala binciken.
Wannan lamari na jaddada bukatar a ƙara tsaurara matakan tsaro a cikin masana’antar banki, domin kare hakkin kwastomomi da tabbatar da cewa ba a yi amfani da tsarin banki wajen aikata laifuka.