A shekarar 2024, Shugaba Bola Ahmed Tinubu ya aiwatar da muhimman matakai da tsare-tsare da suka hada da manyan sauye-sauye a fannin tattalin arziki da zamantakewa a Najeriya. Wannan matakan sun yi fice a cikin al’umma, inda wasu suka jawo muhawara, yayin da wasu kuma suka tabbatar da ingancin su.
1. Tallafin Karatu ga Dalibai
Tinubu ya rattaba hannu kan kudirin tallafin karatu ga dalibai a manyan makarantu, wanda aka kaddamar a watan Afrilu 2024. Wannan mataki ya ba da damar samun tallafi ga dalibai a jami’o’in kasar, wanda za a yi amfani da shi wajen inganta ilimin su.
2. Dawowar Tsohon Taken Najeriya
A ranar 29 ga watan Mayu, Tinubu ya sanya hannu kan dokar dawo da tsohon taken Najeriya, “Nigeria We Hail Thee,” wanda ya maye gurbin taken da aka saba da shi. Wannan yana nuni da sha’awar gwamnatin wajen dawo da al’adun gargajiya na kasar.
3. Sabon Mafi Karancin Albashi
Shugaban ya amince da sabunta mafi ƙarancin albashi daga N30,000 zuwa N70,000, tare da dalilin inganta rayuwar ma’aikata. Wannan mataki ya sa wasu jihohi, kamar Lagos da Rivers, sun yarda da biyan albashin sama da N70,000 ga ma’aikata.
4. Karin Albashi ga Alkalai
A watan Agustan, Tinubu ya amince da karin albashi da alawus ga manyan alkalai, yana mai cewa matakin na nufin rage cin hanci a fannin shari’a.
5. Saurin Sauyin Ministoci
A watan Oktoba, an gudanar da gagarumin sauyin ministoci, inda Tinubu ya nada sababbin ministoci bakwai da kuma sauya wasu daga cikin ma’aikatu. Wannan yana nuni da shirin ingantawa a cikin gwamnatin sa.
6. Gyaran Haraji
Gwamnatin Tarayya ta gabatar da kudirin gyaran haraji, wanda ke nufin inganta hanyoyin tattara haraji da kuma kara yawan haraji don bunkasa karfin tattalin arziki.
7. Yancin Kananan Hukumomi
A ranar 11 ga Yuli, Kotun Koli ta yanke hukunci mai muhimmanci, wanda ya tabbatar da ikon kudin kananan hukumomi 774 na Najeriya, ta yadda za su iya samun kudinsu daga Gwamnatin Tarayya kai tsaye.
Wannan matakan da Tinubu ya aiwatar a 2024 sun nuna cewa gwamnati na da niyyar inganta rayuwar al’umma da kuma bunkasa tattalin arziki a Najeriya.