‘Yan fashi sun kai hari kan tawagar El-Kanemi Warriors a kauyen Rijiyar Malam, kan hanyar Jos-Bauchi, inda suka jikkata ‘yan wasa da jami’ai da dama. Wannan harin ya faru ne yayin da tawagar ke kan hanyarsu ta zuwa wasan gasar kwallon kafa.
Mataimakin mai ba ‘yan wasan horo, Suleiman Abdullahi, ya bayyana cewa an farmake su da misalin karfe 12:45 na daren ranar Asabar yayin dawowa daga Jos zuwa Maiduguri. ‘Yan fashin dauke da makamai sun rufe motoci biyu tare da wata mota kirar saloon, inda suka bude wuta sannan suka fitar da kowa daga cikin motocin.
Suleiman Abdullahi ya ce: “’Yan fashin sun farmake mu da adda da sanda, suka kwace mana kudi, wayoyi, da wasu muhimman kayayyaki. Fiye da mutum goma cikin ‘yan wasan da jami’ai sun jikkata sakamakon wannan harin.”
Bayan faruwar lamarin, an kai wadanda suka jikkata zuwa Asibitin koyarwa na Abubakar Tafawa Balewa da ke Bauchi domin samun kulawa. An kuma kai rahoton lamarin ga ofishin ‘yan sanda na GRA a Bauchi kafin tawagar ta wuce Maiduguri.
Mai magana da yawun rundunar ‘yan sandan Bauchi, SP Ahmed Wakil, ya tabbatar da harin, yana mai cewa sakataran kungiyar, Dahiru Bala, ne ya kai rahoton ga ‘yan sanda. SP Wakil ya ce: “A halin yanzu, kwamishinan ‘yan sanda, Auwal Musa Muhammad, ya ba da umarnin tashi tsaye domin kamo masu laifin.”
Wannan harin na nuna yadda ‘yan fashi ke ci gaba da jefa al’umma cikin tsoro, musamman a arewacin Najeriya. Muna fatan Rundunar ‘yan sanda za ta dauki matakan da suka dace don tabbatar da tsaro a wannan yanki.