Daga Jamoriyar Nijar– Rundunar sojin Nijar ta tabbatar da cewa dakarunta sun hallaka ‘yan ta’addan Lakurawa da suka tsallaka daga Najeriya. Wannan samame ya faru ne a yankin Illela na jihar Tahoua a ranar 21 ga Nuwamba, bayan da sojojin Najeriya suka fatattaki ‘yan fashin daga cikin kasar, suna mai tabbatar da cewa sun tsallaka zuwa Nijar don tserewa daga harin.
Rahotanni sun bayyana cewa sojojin Nijar sun gudanar da wannan aiki ne tare da hadin gwiwar jami’an tsaro, domin toshe yunkurin ‘yan ta’addan da suka yi yunkurin tsallaka daga Najeriya. An ce Lakurawan sun kutsa cikin jamhuriyyar Nijar domin ci gaba da aikace-aikacen su na ta’addanci, wanda hakan ya jawo hankalin sojojin.
A cikin rahoton da rundunar sojin Nijar ta fitar, an bayyana cewa ‘yan ta’addan sun yi sanadiyyar kashe wasu mazauna yankin kafin a gudanar da samamen. Wannan lamari na jawo damuwa a tsakanin al’ummar yankin, wanda ke fuskantar barazanar ‘yan ta’adda a kowane lokaci.
Hakan na nuni da karuwar hadin gwiwa tsakanin sojojin Nijar da Najeriya wajen yaki da ta’addanci. A cewar jami’an tsaro, wannan mataki na nuni da himmar da kasashen ke yi na dakile yunkurin ‘yan ta’adda da ke neman kawo cikas ga tsaro a yankin.
Rundunar sojin Nijar ta bayyana cewa za ta ci gaba da gudanar da ayyukanta na tabbatar da tsaro a cikin kasar, tare da fatan cewa hadin gwiwa da Najeriya zai taimaka wajen shawo kan kalubalen tsaro da ke fuskantar yankin. Wannan samame ya zama wani sabon labari na yaki da ta’addanci, wanda ke tabbatar da cewa kasashen biyu suna da niyyar dakile duk wani yunkuri na kawo cikas ga zaman lafiya da tsaro.