Dakarun sojojin Najeriya, karkashin rundunar Operation Hadin Kai, sun samu nasara a yakin da suka yi da ƴan ta’addan ISWAP a jihar Borno. Wannan nasara ta faru ne a lokacin da sojojin suka daƙile wani harin da ƴan ta’addan suka kai a sansaninsu na Mayanti, da ke ƙaramar hukumar Bama.
A yayin wannan aikin, dakarun sojoji sun yi musayar wuta da ƴan ta’addan, inda suka fatattake su zuwa daji ba tare da an samu asarar rai daga ɓangaren sojojin ba. Rahotanni sun nuna cewa harin ya faru da misalin ƙarfe 01:15 na dare a ranar Lahadi, 16 ga watan Maris 2025.
Bayan fuskantar hare-haren, wata tawagar soji da aka turo ta yi nasarar fatattakar ƴan ta’addan da suka dasa abubuwan fashewa a hanya domin hana sojojin wucewa. Duk da cewa wasu sojojin guda biyu sun sami raunuka, wannan nasara ta tabbatar da jajircewar dakarun wajen tabbatar da tsaro a yankin Arewa maso Gabas.
Masani kan harkokin tsaro a yankin, Zagazola Makama, ya bayyana cewa wannan nasara ta ƙara tabbatar da nasarorin da dakarun ke samu wajen hana ƴan ta’adda aiwatar da munanan ayyukansu. Hakan na nuni da cewa dakarun soji na ci gaba da gudanar da sintiri da bincike a yankin don kawar da sauran barazanar da ƴan ta’addan za su iya kawowa.
Jami’an tsaron sun bayyana cewa haɗin gwiwa da rahotannin sirri suna taka muhimmiyar rawa wajen tabbatar da cewa yankin ya samu dawowar kwanciyar hankali.