Shugaban kwamitin haraji na kasa, Taiwo Oyedele, ya bayyana yadda wasu ‘yan Najeriya ke zagin sa da iyalinsa dangane da kudirin harajin da Bola Tinubu ya gabatar. Oyedele ya yi wannan bayani ne yayin da yake gabatar da rahoton kwamitin ga kungiyar League of Northern Democrats (LND) a Abuja.
Taiwo Oyedele ya ce duk da zagin da suke fuskanta, ba zai karaya ba wajen gudanar da aikin gyaran tsarin haraji a Najeriya. Ya bayyana cewa suna daukar wannan aiki a matsayin sadaukarwa ga al’umma, kuma suna mai da hankali kan ra’ayoyin jama’a domin inganta aikace-aikacen su.
“Ana zagin mu da iyalanmu a shafukan sada zumunta, amma mun kawar da kai,” in ji Oyedele. Ya tabbatar da cewa dukkan kudirorin gyaran haraji sun fito ne daga nazari da tattaunawa da wakilai daga sassa daban-daban na kasar.
Shugaban kwamitin ya bayyana cewa za a ci gaba da tattauna kudirin haraji da karbar korafi daga jama’a domin inganta tsarin. Ya kuma jaddada cewa babu wani shugaba ko kungiya da suka sanya su aiki sauya fasalin harajin.
Wannan lamari ya jawo hankalin al’umma kan yadda ake gudanar da harkokin haraji a Najeriya, tare da nuna damuwa kan irin tasirin da zagin ke yi ga hukumar. Oyedele ya yi kira ga dukkanin masu ruwa da tsaki da su ba da gudummawa wajen inganta tsarin haraji domin amfanin al’umma.