Dan shugaban kasa, Seyi Tinubu, ya bayyana goyon bayansa ga mahaifinsa, Bola Tinubu, yayin da yake zargin wasu ‘yan siyasa da kai wa iyalansa hari bisa zargin cewa suna jawo wa gwamnatin tarayya matsala. Wannan furuci ya fito ne a lokacin da Seyi ke rangadin wasu jihohin Arewa, musamman a Yola, jihar Adamawa.
A yayin taron da ya gudanar da matasa, Seyi ya bayyana cewa akwai wasu mutane da ke yawan kai farmaki ga mahaifinsa da iyalansa saboda matsalolin da suka shafi Najeriya. Ya ce, “Ba siyasa ba ne, amma suna ci gaba da kawo hari a kaina, suna kawo hari a kan iyalina da kuma Asiwaju Bola Ahmed Tinubu, shugaban ƙasa mafi kwazo a tarihin Najeriya.”
Seyi ya jaddada cewa gwamnatin Bola Tinubu ta gudanar da manyan ayyuka a fannin tattalin arziki da ke amfanar dukkanin ‘yan Najeriya. Ya ce, “Shi ne shugaban kasar da ya ƙirƙiri tattalin arziki da kowa ke amfana da shi, shugaban da ba ya ƙoƙarin tara wa kansa dukiya.”
Har ila yau, Seyi Tinubu ya caccaki wasu ‘yan siyasa da suka yi zargin cewa gwamnatin Tinubu ta kasa bayar da tallafi ga yankin Arewa, yana mai cewa duk da hakan, gwamnatin na da niyyar inganta Najeriya. Hakan ya janyo ce-ce-ku-ce a tsakanin masu ra’ayi, inda wasu suka yi suka kan yadda aka gudanar da tallafin a yankin Kudu maso Yamma.
A karshe, Seyi ya karfafa gwiwar matasa da su ci gaba da mara wa gwamnatin Tinubu baya, yana mai cewa lokaci ya yi da za a inganta dimokuradiyya a Najeriya.