A ranar Talata, 31 ga Disamba 2024, Sarkin Musulmi, Alhaji Sa’ad Abubakar, ya umarci al’ummar Musulmi a Najeriya da su fara duba jinjirin watan Rajab na shekarar 1446H. Wannan sanarwa ta fito ne daga fadar sarkin Musulmi a jihar Sakkwato, tare da sa hannun Farfesa Sambo Junaidu, shugaban kwamitin kula da harkokin Musulunci.
Sarkin ya bayyana cewa ranar Talata ita ce ranar da za a fara duba sabon watan, wadda ta kasance 29 ga watan Jumada As-Sani. Ya yi kira ga Musulmi da su kai rahoton ganin sabon watan ga hakimi ko magajin gari mafi kusa.
Rajab na daya daga cikin watanni hudu masu tsarki a Musulunci, inda aka haramta yaki a cikinsu. Sarkin Musulmi ya yi addu’ar Allah ya taimaki dukkan Musulmi yayin gudanar da ibadarsu, yana mai jaddada mahimmancin wannan lokaci a cikin al’umma.
Haka kuma, sarkin ya yi kira ga Musulmai su kasance cikin shiri don watan azumin Ramadan da ke karatowa, wanda ke da matukar muhimmanci a cikin addinin Musulunci.