A ranar Laraba, 5 ga Maris, 2025, ‘yan sanda sun yi amfani da barkonon tsohuwa don tarwatsa masu zanga-zanga a gaban majalisar tarayya a Abuja. Wannan zanga-zanga ta biyo bayan zargin da Sanata Natasha Akpoti-Uduaghan ta yi wa shugaban majalisar dattawa, Godswill Akpabio, na neman ta da lalata.
Matasan sun hallara a kofar majalisar tun da misalin karfe 8 na safe, suna dauke da kwalaye masu rubuce-rubuce kamar “Dole ne Akpabio ya sauka” da “Kare hakkin mata”. Wannan zanga-zanga ta jawo hankalin jami’an tsaro, wanda hakan ya sa aka tura ‘yan sanda, NSCDC, da sojoji wurin domin hana tashin hankali.
Rahotanni sun nuna cewa ‘yan sanda ba su yi jinkirin harba hayaƙi mai sanya hawaye ba, wanda ya tilasta wa masu zanga-zangar tsere daga wurin. Bayan tarwatsawa, sun koma bangaren Unity Fountain inda suka ci gaba da nuna adawarsu kan zargin cin zarafin da Natasha ta yi.
Zanga-zangar ta samo asali ne daga sabani tsakanin Sanata Natasha da shugaban majalisar, inda ta zarge shi da nuna mata wariya. Wannan rikici ya jawo hankalin al’umma da dama, inda ake sa ran Sanata Natasha za ta gurfanar gaban kwamitin ladabtarwa na majalisar a yau.
Rikicin ya bayyana yadda al’amuran siyasa ke yawaita tasiri a cikin al’umma, tare da nuna damuwar matasa game da hakkin su da kuma tsarin shugabanci a Najeriya.