A jihar Oyo, sarakuna biyar da ke da alhakin zaɓen sabon Alaafin sun bai wa Gwamna Seyi Makinde wa’adin kwanaki 30 ya soke nadin Akeem Owoade da ya yi. Wannan mataki ya biyo bayan zargin da gwamnan ya yi na cewa an aikata cin hanci a tsarin zaben, wanda sarakunan suka musanta.
Sarakunan, karkashin jagorancin Basorun na Oyo, Mai martaba Yusuf Ayoola, sun bayyana cewa zaben Alaafin aiki ne na Oyomesi kawai, ba na gwamna ba. Sun yi barazanar daukar matakin shari’a idan gwamnan ya gaza soke nadin da ya yi ba tare da bin ka’ida ba.
A cewar masu zaɓen, nadin da gwamnan ya yi ya karya dokar nadin Alaafin ta 1961. Haka nan, sun kalubalanci gwamnan ya gabatar da shaida a kotu don tabbatar da zargin da ya yi na cin hanci a yayin gudanar da tsarin zaben.
Wannan rikici ya janyo cece-kuce a cikin masarautar Oyo, inda mutane da dama ke kallon wannan lamari a matsayin sabani na siyasa da al’ada. Sarakunan sun gargadi gwamnan kada ya kara yin wasu kalamai da zasu bata musu suna.
Gwamna Makinde ya nada Akeem Owoade a matsayin sabon Alaafin, wanda wasu daga cikin sarakunan Oyomesi suka yi watsi da shi, suna mai cewa Yarima Lukman Gbadegesin, wanda aka zaba bisa doka, ya dace da wannan muƙami.
Wannan lamari na nadin Alaafin yana daya daga cikin muhimman batutuwa da ke tashe a jihar Oyo, wanda ke neman sulhu tsakanin gwamna da sarakunan masarautar.