Tsohon gwamnan jihar Kaduna, Malam Nasir El-Rufai, ya tabbatar da cewa ya fice daga jam’iyyar APC (All Progressives Congress) a hukumance, inda ya bayyana komawarsa jam’iyyar SDP (Social Democratic Party). Wannan sauyin ya zo ne bayan shekaru 12 da ya shafe a APC, wanda ya ce jam’iyyar ta sauya daga manufofinta na asali.
A cikin sanarwa da ya wallafa a shafinsa na Facebook, El-Rufai ya bayyana cewa ya miƙa wasiƙar murabus dinsa daga jam’iyyar a mazabarsa. Ya ce ya yanke wannan hukunci ne bayan tattaunawa da abokansa da magoya bayansa, wanda ya nuna cewa APC ta yi watsi da manufofin ci gaba da aka kafa a lokacin da aka kafa ta.
El-Rufai ya bayyana cewa, “A matsayina na ɗaya daga cikin wadanda suka kafa jam’iyyar APC, na yi ƙoƙari wajen ganin jam’iyyar ta samu nasara a zaɓukan 2015, 2019, da 2023. Duk da haka, abubuwan da suka faru a cikin shekaru biyu da suka gabata sun tabbatar da cewa waɗanda ke da iko a jam’iyyar a halin yanzu ba su da sha’awar magance matsalolin da APC ke fuskanta.”
Ya kuma bayyana cewa a matsayin mamba a SDP, zai ci gaba da ƙoƙarin haɗa kai da shugabannin adawa domin kalubalantar shugaban ƙasa, Bola Ahmed Tinubu, a zaɓen 2027. El-Rufai ya yi kira ga dukkan magoya bayansa da su shigo jam’iyyar SDP don gina Najeriya mai inganci.
Wannan sauyin ya jawo martani daga ƴan Najeriya da dama, inda wasu suka maraba da wannan mataki, yayin da wasu ke ganin zai iya kawo canji a siyasar Najeriya.