Karamin Ministan Harkokin Noma, Aliyu Abdullahi, ya tabbatar da cewa Najeriya ba ta fuskantar haɗarin ƙarancin abinci, duk da rahotannin da suka nuna yiwuwar samun wannan matsala. A cikin wata hira da Channels News, Ministan ya bayyana cewa gwamnatin tarayya tana daukan matakai masu inganci don tabbatar da wadatar abinci a kasar.
Ministan ya yi wannan bayani ne a matsayin martani ga rahoton da ke nuna cewa ƴan Najeriya na iya fuskantar ƙarancin abinci. Ya ce Shugaba Bola Tinubu yana sane da muhimmancin tabbatar da an wadata ƙasa da abinci, wanda ya sa ya ayyana dokar ta-baci a fannin abinci bayan kama aiki.
Abdullahi ya bayyana cewa Najeriya tana da rumbunan ajiyar abinci da suka wadatu, kuma an yi tanadi don karfafa wadatar abinci a jihohi da dama. Ya musanta zargin cewa Najeriya ba ta wadatu da abinci, yana mai cewa an samu duk nau’in abinci a kasuwa, don haka babu dalilin fargaba.
A cewarsa, “Najeriya ba ta cikin haɗarin ƙarancin abinci; ba ta taɓa kasancewa ba, kuma ba za ta kasance a cikin ƙarancin abinci ba, da ikon Allah.” Ministan ya yi ikirarin cewa gwamnatin tarayya na aiki tukuru wajen dakile hauhawar farashin abinci da ke faruwa a kasuwa.
Hakanan, ya bayyana cewa an samu saukin farashin kayayyakin abinci a kasuwanni, wanda hakan ya nuna cewa samuwar hatsi daga manoman ƙasar na taimakawa wajen saukaka farashi. Wannan tabbaci daga gwamnatin tarayya na nuni da cewa Najeriya na da cikakken shirin don tabbatar da cewa talakawa suna samun abinci mai inganci da arha.