Wata matashiya da ake zargi a matsayin matar ɗan bindiga ta fitar da bidiyon da take roƙon sojojin Najeriya da su daina kashe ‘yan bindiga da suka kama. A cikin bidiyon, matar ta bayyana damuwarta kan kisan ‘yan bindiga da sojoji ke yi a cikin daji, tana mai cewa ba su kadai ne ke aikata laifuffuka ba.
Bidiyon wanda aka wallafa a shafin X ya jawo cece-kuce a kafafen sada zumunta, inda wasu ke ganin hakan alama ce ta rashin aikin sojoji, yayin da wasu ke zarginsu da laifin kisan da suke yi. Matar ta bayyana cewa, “Idan kun kama mazajenmu a cikin fashi ko barna, ka da ku kashe su,” tana mai kira ga sojoji da su daina aikata irin wannan kisan.
A cikin bidiyon na tsawon dakika 15, matar ta yi magana da jin dadin muryarta, inda ta ce, “Sojoji ma suna aikata barna kamar yadda ‘yan bindiga ke yi, don haka bai dace a kashe su ba idan aka cafke su.”
Wannan jawabi na matar ya jawo hankalin jama’a, inda wasu suka yi martani suna ganin cewa ya kamata a bincika wannan lamari. Wani mai ra’ayi, Abdulrasheed, ya ce, “Ya kamata a bi diddigi domin cafke ta saboda ta fuskanci hukunci daidai da ita.”
Yayin da wannan lamari ke ci gaba da jawo cece-kuce, sojojin Najeriya na ci gaba da gwagwarmaya da ‘yan ta’adda, musamman a Arewacin Najeriya. Ana fatan cewa wannan sako daga matar dan bindiga zai ja hankalin hukumomi kan yanayin da ake ciki a tsakanin sojoji da ‘yan ta’adda.