Kungiyar likitoci masu neman kwarewa ta NARD ta yi barazanar daukar mataki na yajin aiki idan gwamnati ba ta gaggauta biyan bukatunsu ba a cikin kwanaki 10 masu zuwa. Wannan sanarwa ta fito ne bayan wani taro da kungiyar ta gudanar a ranar Lahadi, inda suka bayyana damuwarsu game da yadda gwamnatin tarayya ke watsi da bukatunsu.
A cikin sanarwar da shugaban NARD, Dakta Tope Osundara, ya fitar, kungiyar ta zargi gwamnatin Bola Ahmed Tinubu da kin daukar matakin da aka cimma a baya don inganta yanayin aiki da jin dadin ma’aikatan lafiya. Sun ce an yi biris da yarjejeniyar da aka kulla da gwamnati, wanda hakan ya sa suka yanke shawarar ba da wa’adin kwanaki 10.
NARD ta jaddada cewa tun watan Yuli, ta bai wa gwamnati wa’adin makonni uku, amma tun daga lokacin, ba a ga wani ci gaba ba. A cewarsu, idan har gwamnatin ba ta dauki mataki ba, za su tsunduma cikin yajin aiki wanda zai girgiza bangaren lafiya a kasar.
Kungiyar ta kuma bayyana damuwarta kan rashin biyan kuɗin horon likitoci na shekarar 2025 da sauran hakkokinsu, ciki har da biyan bashin karin albashin da aka yi alkawarin biya. Sun yi kira ga gwamnatin ta gaggauta biyan dukkanin hakkokinsu da kuma warware matsalolin da ke damun asibitoci a jihohi kamar Kaduna da Oyo.
A karshe, NARD ta yaba wa gwamnonin da suka biya kuɗin MRTF na 2025, tana mai cewa hakan na nuni da kishin jin daɗin ma’aikatan lafiya. Wannan yanayi na nuna rashin jituwa a tsakanin likitoci da gwamnatin tarayya na ci gaba da damun al’ummar Najeriya.