Hukumar kwastam ta Najeriya ta sanar da kama wata mota da ke dauke da sinadaran da ake zargin ana hada bama-bamai da su. Wannan kama ta faru ne a yayin gudanar da sintiri da bincike a hanyar Legas zuwa Badagry.
Jami’an kwastam sun yi nasarar damke motar bayan sun yi bincike mai kyau kan kayayyakin da ake shigo da su cikin ƙasar. A yayin wannan samame, an kuma kama mutum guda da ake zargi da alaƙa da motar.
Shugaban hukumar kwastam na reshen Seme, Kwanturola Ben Oramalugu, ya bayyana cewa an gano kwalaye guda shida na sinadarin mercury a cikin motar, wanda ake zargin ana amfani da shi wajen hada bama. Ya jaddada cewa wannan nasara na daga cikin kokarin hukumar wajen tabbatar da tsaro a Najeriya da kuma yaki da ta’addanci.
Baya ga kayan hada bam, hukumar ta kuma kama wasu kayayyaki da suka sabawa doka, ciki har da kuɗin ƙasashen waje da suka kai darajar Naira miliyan tara. Wannan ya haɗa da kudin daga kasashe kamar Birtaniya, Kanada, da Amurka.
Oramalugu ya ce, “Wannan aiki yana nuna himma da ƙoƙarin da muke yi wajen hana fasa-kwauri da duk wani aikin da ya saba wa doka a iyakokin ƙasar.” An shaidawa cewa duk kayan da aka kama za a mika su ga hukumomin da suka dace domin gudanar da bincike da gurfanar da wanda ake zargi a gaban kotu.
Hukumar kwastam na ci gaba da gudanar da ayyukanta na tabbatar da tsaro a ƙasar, tare da kira ga al’umma da su bayar da haɗin kai wajen yaki da ta’addanci da sauran laifuka.