Kwamishinan Ma’aikatar Kula da Ayyukan Gwamnatin Kano, Injiniya Muhammad Diggol, ya yi murabus daga mukaminsa a gwamnatin Gwamna Abba Kabir Yusuf. Wannan mataki ya biyo bayan dakatar da shi daga jam’iyyar NNPP bisa zargin rashin biyayya ga shugabancin jam’iyyar.
A cikin sanarwa da Daraktan Yada Labaran Gwamnatin Kano, Sanusi Bature, ya fitar, Gwamna Abba ya amince da murabus din Diggol, inda ya gode masa bisa ga gudunmawar da ya bayar a cikin wa’adin mulkinsa. Gwamna Abba ya jinjinawa Injiniya Diggol bisa jajircewarsa da kwarewarsa a cikin lokacin da ya yi aiki a matsayin ɗan majalisar zartarwa.
Duk da cewa ba a bayyana dalilin murabus ɗin ba, wannan lamari ya faru ne a lokacin da aka yi sabon nade-nade a cikin majalisar zartarwa ta jihar. Gwamna Abba ya bayyana fatan alheri ga Injiniya Diggol a dukkanin ayyukan da zai runguma a gaba, yana mai cewa yana fatan zai ci gaba da bayar da gudunmawa ga ci gaban jihar.
Ana sa ran Injiniya Diggol zai iya komawa cikin NNPP idan aka sasanta rikicin da ke tsakaninsa da shugabancin jam’iyyar, ko kuma zai duba wata sabuwar dama ta siyasa. Wannan lamari ya jawo ce-ce-ku-ce a cikin al’umma, inda mutane ke sa ran abin da zai biyo baya a siyasar jihar Kano.