Ma’aikatar ilimi ta Najeriya ta bayyana cewa ana garambawul ga kudirin haraji da gwamnatin tarayya ta gabatar, wanda ke shafar asusun tallafawa ilimin manyan makarantu (TETFund). Wannan gyara yana da matukar muhimmanci wajen tabbatar da cewa TETFund ba zai daina samun kuɗi ba.
Ministan ilimi, Tunji Alausa, ya yi gargadi cewa idan ba a yi gyaran kafin amince wa da kudirin haraji ba, TETFund na fuskantar ragin kuɗi daga 2025 zuwa 2029, sannan daga shekarar 2030 zai daina samun wani kaso gaba ɗaya. Wannan yanayi na iya ruguza TETFund, wanda ke da muhimmiyar rawa wajen gina kayayyakin more rayuwa a manyan makarantu.
A cikin sanarwa, Alausa ya ce, “Mun zauna tare da kwamitin gyaran haraji na majalisar dokoki domin kare asusun TETFund.” Ya bayyana cewa, “Dole ne mu tabbatar da cewa TETFund zai ci gaba da wanzuwa har abada.”
Sabon tsarin harajin da aka gabatar na nufin rage kuɗin da TETFund ke samu daga haraji, wanda zai shafi yadda kudin zai kasance daga shekarar 2025/2026, inda za a bukaci kamfanoni su biya 4%, sannan daga 2027 zuwa 2029 kudin zai ragu zuwa 3%.
Masana da sauran masu ruwa da tsaki sun nuna damuwa game da wannan kudiri, suna ganin cewa hakan na iya zama yunkuri na ruguje TETFund. A yanzu haka, majalisar wakilai na shirin nazarin rahotannin kudirin harajin kafin a kai ga amincewa da shi.
Shugaban majalisar, Rt. Hon. Abbas Tajudeen, ya bukaci ‘yan majalisa da su halarci zaman tantance rahoton a ranar Alhamis. Wannan mataki na iya zama mafita ga matsalar da TETFund ke fuskanta, idan har aka yi gyara mai kyau.