A yau Juma’a, 22 ga watan Nuwamba, 2024, kotun koli ta Najeriya ta soke dokar caca ta kasa ta 2005, inda ta ce majalisar dokokin tarayya ba ta da hurumin yin doka a kan batutuwan da suka shafi caca da wasannin sa’a.
Wannan hukuncin ya zo ne bayan karar da jihar Legas da wasu jihohi suka shigar a shekarar 2008, inda suka kalubalanci dokar caca ta kasa, suna masu cewa ta saba wa kundin tsarin mulkin kasar.
Kwamitin alkalai bakwai ƙarƙashin jagorancin Mai shari’a Muhammed Idris ne ya yanke wannan hukuncin ranar Juma’a, 22 ga watan Nuwamba
A hukuncin da ya karanto a harabar kotun ƙoli, Mai Shari’a Mohammed Idris, ya ba da umarni daina amfani da dokar caca a faɗin jihohi 36 a Najeriya. Ya ce dokar za ta cu gaba aiki ne a babbar birnin tarayya Abuja kaɗai saboda nan ne majalisar dokoki ta ƙasa ke da ikon kafa doka.
Kotun koli ta yanke hukuncin ne da murya daya, inda ta ce majalisun dokokin jihohi ne kadai ke da ikon kafa dokokin da suka shafi caca a yankunansu. Wannan ya samo asali ne daga sashe na 4(7) na kundin tsarin mulkin Najeriya na 1999, wanda ya bai wa jihohi ikon yin dokoki kan harkokin caca.
Wannan hukuncin na da muhimmanci ga masu harkar caca a Najeriya, domin ya bude kofa ga jihohi su kafa dokokinsu na caca. Hakan kuma na nufin cewa masu harkar caca za su iya samun damar yin kasuwanci a jihohin da suka amince da hakan.
Duk da haka, har yanzu ba a san yadda wannan hukuncin zai shafi masu harkar caca a babban birnin tarayya Abuja ba, domin kotun koli ta ce dokar caca ta kasa za ta ci gaba da aiki a can. Wannan ya samo asali ne daga sashe na 241 na kundin tsarin mulkin Najeriya na 1999, wanda ya bai wa majalisar dokokin tarayya ikon yin dokoki kan harkokin caca a babban birnin tarayya.