Hukumar NDLEA ta jihar Kano ta sanar da cewa ta kama mutane 1,345 bisa laifin shan kwayoyi da fataucin su a shekarar 2024. Wannan nasara ta biyo bayan aikin da hukumar ta gudanar wanda ya hada da rushe sansanonin kwayoyi 20 a wurare daban-daban na jihar.
Kwamandan hukumar NDLEA na Kano, Abubakar Idris-Ahmad, ya bayyana cewa an kwace jimillar kilogram 8,430 na miyagun kwayoyi, ciki har da tramadol miliyan biyar. Hakanan, hukumar ta gudanar da gwaje-gwajen kwayoyi ga mutane 1,114 da suka nemi tsayawa takarar shugabancin kananan hukumomi.
Idris-Ahmad ya ce hukumar ta gudanar da shirin “Operation Hana Maye,” wanda ya nufin magance matsalar shan kwayoyi a Kano. Ya bayyana cewa matasa 101 da suka tsunduma cikin shan kwayoyi sun samu taimako daga hukumar da kuma shirin da aka kirkiro don dawo da su cikin al’umma.
A cikin sanarwar da ya fitar, Idris-Ahmad ya godewa shugaban NDLEA na kasa, Mohammed Buba-Marwa, bisa goyon bayan da ya bayar wajen samun nasarorin da hukumar ta cimma. Hakanan, ya yi godiya ga gwamnatin Kano da sauran hukumomi da suka ba da hadin kai a wannan yaki da kwayoyi.
Hukumar ta kuma yi wa al’umma kira da su ci gaba da bayar da bayanai kan masu fataucin kwayoyi domin a samu zaman lafiya da tsaro a jihar Kano.