Hukumar Alhazai ta ƙasa (NAHCON) ta sanar da cewa maniyyata da ke shirin zuwa aikin Hajjin shekarar 2025 za su kammala biyan kuɗaɗensu kafin ranar 31 ga watan Janairu, 2025. Wannan sanarwa ta fito daga bakin shugaban hukumar, Farfesa Abdullahi Usman.
Hukumar ta tunatar da maniyyatan cewa duk wanda ya gaza kammala biyan kuɗin kafin wannan wa’adin ba zai samu damar zuwa Hajjin bana ba. Farfesa Abdullahi Usman ya bayyana cewa gwamnatin Saudiyya ta yi gargaɗi a kan wannan wa’adi, wanda aka tabbatar a tarurruka da aka yi.
A cewarsa, “Mun tabbatar da cewa ba za mu iya ba da tabbacin samun ƙarin lokaci ga duk maniyyatan da suka kasa kammala biyan kuɗaɗensu ba. Ko dai mutum ya biya kuɗin, ko kuma ya rasa damar zuwa Hajjin 2025.”
Haka zalika, Farfesa Usman ya yi kira ga hukumomin jin daɗin alhazai na jihohi su ƙara ƙaimi wajen wayar da kan maniyyata don su tabbatar sun kammala biyan kuɗaɗensu kafin wa’adin. Wannan mataki na NAHCON yana nufin inganta tsarin gudanar da aikin Hajji da kuma tabbatar da cewa maniyyata sun shirya da kyau.