Wani hargitsi ya faru a makarantar Musulunci ta Basorun a Ibadan, wanda ya yi sanadin mutuwar mutane da dama tare da raunata wasu. Wannan taron sada zumunci ya jefa jihar Oyo cikin jimami, yayin da gwamna Seyi Makinde ya bayyana alhini kan lamarin.
Gwamnan ya tabbatar da cewa an dauki matakan gaggawa domin shawo kan lamarin, ciki har da tura jami’an tsaro zuwa wurin domin dawo da doka da oda. Haka kuma, an dakatar da taron gaba ɗaya domin tabbatar da tsaro.
A cikin wani sako da gwamnan ya wallafa, ya bayyana cewa an tura ma’aikatan lafiya da motocin daukar marasa lafiya zuwa wurin domin kula da wadanda suka samu raunuka. Gwamna Makinde ya yi kira ga al’umma da su bayar da hadin kai wajen binciken abin da ya faru, tare da tabbatar da cewa ba za a sake samun rasa rayuka ba a nan gaba.
Masu shirya taron sun shiga hannun jami’an tsaro, inda ake ci gaba da gudanar da bincike kan lamarin. Gwamna Makinde ya yi ta’aziyya ga iyalan wadanda hatsarin ya rutsa da su, yana mai addu’ar Allah ya jikan wadanda suka rasu.