Gwamnonin Najeriya 36, karkashin kungiyar Gwamnonin Jihohi (NGF), sun bayyana goyon bayansu ga shirin gyaran haraji na Shugaba Bola Tinubu, amma sun yi watsi da karin harajin VAT. A cikin wani zama da suka yi, gwamnonin sun gabatar da sabuwar hanyar rabon harajin VAT don inganta daidaito a tsakanin jihohi.
A cikin sanarwar da aka fitar, gwamnonin sun jaddada cewa karin harajin VAT ba zai yiwu a yanzu ba, domin suna son tabbatar da jin dadin jama’a da daidaiton tattalin arziki a kowace jiha. Hakan ya biyo bayan damuwa da suka nuna kan yadda karin haraji zai shafi talakawa.
Sabuwar hanyar rabon VAT da gwamnonin suka amince da ita ta kunshi raba kaso 50 tsakanin jihohi, kaso 30 bisa ga yawan harajin da kowanne jiha ta tara, da kaso 20 bisa ga yawan al’ummar kowace jiha. Wannan tsarin na nufin tabbatar da adalci da inganci a rarraba albarkatun kasa.
Shugaban NGF, Abdulrahman Abdulrasaq, ya bayyana cewa wannan sabuwar hanya za ta taimaka wajen tabbatar da daidaito a cikin raba haraji. Gwamnonin sun kuma nuna goyon bayansu ga ci gaba da tsarin dokokin haraji a majalisar tarayya, tare da ba da shawarar cewa a bar haraji da aka ware wa wasu hukumomin ƙasa kamar NITDA da TETFund.
Wannan mataki na gwamnonin ya fito ne a lokacin da Najeriya ke fuskantar kalubale a fannin tattalin arziki, kuma yana nuni da karfin hadin kai tsakanin jihohi wajen magance matsalolin haraji da samar da ingantaccen tsarin tattalin arziki.