Gwamnatin tarayya ta bayyana cewa ba laifin Nyesom Wike, Ministan Birnin Tarayya ba ne, a cikin rikicin da ya haifar da ayyana dokar ta-baci a Jihar Rivers. Antoni Janar na Tarayya, Lateef Fagbemi, ya bayyana wannan a yayin taron manema labarai a Abuja.
A cewarsa, Gwamna Siminalayi Fubara ne ya haddasa rikicin ta hanyar rushe Majalisar Dokokin Jihar, wanda hakan ya jawo cece-kuce a cikin al’umma. Fagbemi ya shawarci masu adawa da matakin da Shugaba Bola Tinubu ya ɗauka su kai kukansu gaban Majalisar Tarayya.
Shugaba Bola Tinubu ya ayyana dokar ta-baci a jihar a ranar Talata, yana mai bayani cewa matsalar siyasa ce ta haddasa hakan. Wannan mataki na gwamnati ya jawo zarge-zarge ga Wike, wanda wasu ke ganin yana da alhakin rikicin, amma Fagbemi ya wanke shi daga wannan zargi.
Fagbemi ya ce, “Wike ba shi da hannu a rushe Majalisar Dokokin Jihar Rivers.” Ya kara da cewa, “Kotun Koli ta tabbatar da cewa Gwamna Fubara ne ya haddasa matsalar ta hanyar daukar matakin da ba bisa doka ba.”
A yayin da aka yi hira da fitaccen dan jarida, Mahmud Jega, ya bayyana cewa ya kamata a dora wa Wike alhakin rikicin, kasancewarsa jigon rabuwar kai a majalisar dokokin jihar.
Gwamnatin tarayya ta ce idan har Majalisar Tarayya ta ga cewa matakin Shugaban Kasa bai dace ba, to ba za ta amince da shi ba. Wannan yanayi na nuna yadda gwamnati ke kokarin tabbatar da doka da oda a jihar Rivers, wanda ke fuskantar kalubale a fannin siyasa.