Gwamnatin Kano ta karbi tallafin dabino daga hukumomin Saudiyya a lokacin da musulmi suka fara azumin watan Ramadan. Wannan tallafi ya kunshi tan 50 na dabino, wanda aka rarraba a cikin jihohin Arewacin Najeriya.
Ofishin jakadancin Saudiyya da ke Kano ya bayyana cewa wannan tallafi na dabino yana daga cikin ayyukan jin ƙai da ƙasar Saudiyya ke gudanarwa a kowace shekara domin taimaka wa musulmi. A wani taron da aka gudanar a jihar Kano, wakilan masarautar Saudiyya sun raba katan-katan dabino 1,250 ga gwamnatin Kano da sauran jihohin Arewa.
Jakadan Saudiyya a Kano, Khalil Adamawy, ya ce, “Wannan tallafi yana nufin karfafa dangantaka tsakanin Saudiyya da Najeriya, tare da taimakawa iyalai mabuƙata.” Ya kuma jaddada cewa ƙasar Saudiyya za ta ci gaba da bayar da taimako ga al’umma, musamman marasa ƙarfi.
Sakataren gwamnatin Kano, Faruk Ibrahim, ya bayyana godiya ga hukumomin Saudiyya bisa wannan kyauta, yana mai cewa wannan taimako zai kara karfafa alakar da ke tsakanin Kano da Saudiyya.
Hakan yana zuwa ne a daidai lokacin da musulmi suka fara azumin Ramadan, bayan da aka tabbatar da ganin watan. Wannan tallafi na dabino na daga cikin kyaututtukan da Saudiyya ke bayarwa domin taimaka wa musulmi a fadin duniya.