Lahadi, Disamba 01, 2024— Gwamnatin jihar Legas ta musanta jita-jitar da ke cewa ta haramta bugawa da sayar da ruwan leda a jihar. Kwamishinan Muhalli, Tokunbo Wahab, ya bayyana cewa gwamnati ba ta da shirin haramta ruwan leda.
Tokunbo Wahab ya bayyana a shafinsa na X cewa bidiyon da aka gani a soshiyal midiya yana nuna wasu jami’ai suna kwace ruwan leda, amma ya tabbatar cewa wannan ba daga gwamnati ba ne. Ya ce jami’an da aka gani a bidiyon suna daga hukumar kula da abinci da magunguna ta kasa (NAFDAC), suna gudanar da aikin hana amfani da ruwan leda da bai dace da ka’idojin NAFDAC ba.
Salim Isah, manajan gidan ruwan Dantafiya Table Water, ya nuna cewa talakawa suna dogara da ruwan leda, musamman ma a lokacin da ba su da ruwan famfo. Ya yi kira ga gwamnati da ta taimaka wajen horar da matasa kan sana’ar ruwan leda, bayan bayyana damuwarsa kan tsadar kayayyakin kasuwanci.
Gwamnatin Legas ta jaddada cewa ba ta da wani shiri na hana ruwan leda, kuma ta bukaci al’umma da su yi watsi da duk wata jita-jita da ke nuna cewa an haramta ruwan leda a jihar.