Gwamnan jihar Yobe, Mai Mala Buni, ya yi ziyarar bazata a aikin gina hanyar Damaturu zuwa Kalallawa, inda ya tallafa wa talakawa da ma’aikatan da ke aikin. Wannan ziyara ta jawo farin ciki a tsakanin ma’aikatan hanya da masu itace, inda gwamnan ya raba tallafin kudi ga masu saran itace.
Gwamnan ya lura da wasu masu itace suna tura itace daga daji zuwa cikin garin Damaturu, wanda ya sa ya umarci hadimansa su bayar da tallafin kudi domin rage musu radadin rayuwa. Musa Mai Itace, wanda ya karɓi tallafi naira 50,000, ya bayyana matukar farin cikinsa, yana mai cewa wannan kyautar ta zo masa a lokacin da ya dace.
Matafiya da ma’aikatan hanya suma sun amfana da wannan tallafi, inda gwamnan ya tabbatar musu da cewa wannan mataki na nuni da kulawarsa ga talakawa da ci gaban al’umma. Jama’a da dama sun yi ta yabon gwamnan a kafar sada zumunta, suna bayyana cewa irin wannan shugabanci yana kawo ci gaba da jin dadin al’umma.
Gwamnan ya ce, “Zamu ci gaba da tallafawa al’umma domin inganta rayuwarsu da kuma tabbatar da ci gaban jihar Yobe.” Wannan mataki na gwamnan na daga cikin shirye-shiryen da gwamnatin jihar ke aiwatarwa domin rage talauci da inganta rayuwar al’umma.