Gwamnan jihar Kaduna, Uba Sani, ya bayyana damuwarsa game da yadda wasu ‘yan siyasa ke kokarin siyasantar da batun tsaro a jihar. Wannan gargadi ya zo ne bayan maganganun tsohon gwamnan jihar, Nasir El-Rufai, wanda ya zargi Uba Sani da Nuhu Ribadu da amfani da lamarin tsaro don cimma manufofinsu na siyasa.
Gwamnan ya yi wannan jawabin ne a wani taron da ya gudana a fadar gwamnati, inda ya karbi wasu mutane 58 da aka ceto daga hannun ‘yan bindiga. Ya ce gwamnatinsa ba za ta yi kasa a gwiwa ba wajen daukar matakai masu kyau don tabbatar da tsaron rayukan al’umma.
Uba Sani ya yi Allah-wadai da masu amfani da rashin tsaro don samun riba, yana mai cewa irin wannan halayyar na iya jefa rayukan fararen hula cikin hadari. Ya kuma yi kira ga ‘yan siyasa da su guji yada labaran karya kan tsaro, yana mai cewa wannan na iya bata sunan gwamnatin jihar.
Gwamnan ya bayyana cewa gwamnatin Kaduna na da kudirin dawo da zaman lafiya a jihar, tare da jaddada nasarorin da aka samu ta hanyar shirin dawo da zaman lafiya, musamman a yankunan da ke fama da rikici kamar Birnin Gwari.
A karshe, Uba Sani ya yi alkawarin ci gaba da tallafawa wadanda aka ceto da kudade da za su taimaka musu wajen farfado da rayuwarsu, ciki har da bayar da tallafin kasuwanci da noma. Wannan yana daga cikin matakan da gwamnatinsa ke dauka don inganta tsaro da zaman lafiya a jihar Kaduna.