Gwamnan jihar Ribas, Siminalayi Fubara, ya ba da umarnin tura kyautar N100,000 ga kowane ma’aikaci da ɗan fansho a jihar, domin su yi shagulgulan bikin Kirismeti da sabuwar shekara cikin walwala. Wannan kyautar ta kasance alawus na musamman da gwamnan ya tanada domin inganta jin dadin ma’aikata a lokacin bikin.
Shugaban ma’aikatan gwamnatin jihar, Dr. George Nweke, ya tabbatar da wannan mataki a cikin wata sanarwa da ya fitar. Ya ce, “Ma’aikatan gwamnati a dukkan hukumomi za su ci gajiyar wannan alawus na Kirismeti.”
Gwamna Fubara ya bayyana jin dadinsa kan wannan tsarin, yana mai cewa yana da matuƙar muhimmanci a tabbatar da cewa ma’aikata suna jin daɗin bikin Kirismeti. Wannan kyautar ta zo ne a matsayin ci gaba daga abin da ya yi a bara, inda gwamnan ya gwangwaje ma’aikata da irinta kyautar.
Hakanan, an sanar da cewa gwamnatin jihar Ribas ta fara biyan sabon mafi ƙarancin albashi na N85,000 ga ma’aikata, wanda ya jawo farin ciki a tsakanin su. Wannan mataki na gwamna na tabbatar da cewa ma’aikatan suna da ingantaccen tallafi a lokacin bukukuwan.