Gwamnan jihar Nasarawa, Abdullahi A. Sule, ya yi taron raba tallafi ga almajirai da marasa galihu sama da 500 a babban birnin jihar, Lafia. Wannan mataki na gwamna Sule an yi shi ne a matsayin sadaka don neman lada da yardar Allah a cikin watan Ramadana.
Gwamnan ya bayyana cewa wannan kyauta ta kasance ta kansa, ba daga gwamnatin jihar ba, domin taimaka wa marasa galihu a wannan lokaci mai albarka. A lokacin rabon tallafin, ya ce: “Na yi hakan ne don neman yardar Allah, ba wani dalili ba.”
Bayan rabon tallafin, mutane da dama sun bayyana ra’ayoyinsu kan wannan lamari. Wasu sun yi murna da wannan kyauta, suna yaba wa gwamnan, yayin da wasu kuma suka caccaki shi, suna mai cewa kamata ya yi a samar da ingantaccen tsarin karatu ga almajirai maimakon tallafi na lokaci-lokaci.
Daga cikin masu yin martani, Abdullahi Muslim ya bayyana cewa: “Ka burge ni sosai. Allah ya ƙara albarka.” Sai dai Onah Kingsley ya caccaki gwamnan, yana mai cewa kashi 80% na almajirai ba sa zuwa makaranta, ya kamata a mai da hankali kan hakan.
Malami Abubakar Kari ya bayyana cewa duk da cewa sadakar gwamna abu ne mai kyau, ya kamata ya kasance tare da ingantaccen tsarin gudanar da ilimi a jihar. Wannan lamari na rabon tallafi ya jawo hankalin al’umma da dama, inda aka nuna bukatar inganta rayuwar almajirai da marasa galihu a jihar Nasarawa.