Gwamnan jihar Nasarawa, Abdullahi Sule, ya sanar da dakatar da shugaban hukumar kula da harkokin malamai (TSC) da wasu mambobin tawagarsu nan take, bayan gano wata badaƙala a cikin tsarin daukar sababbin malamai 1,000.
Wannan mataki na gwamna ya biyo bayan rahotannin da suka nuna cewa hukumar ta ɗauki malamai fiye da 1,000 ba bisa ka’ida ba, wanda hakan ya saba wa umarnin da gwamna ya bayar. Haka zalika, an bayyana cewa malamai da aka ɗauka sun gaza samun albashinsu, wanda ya jawo cece-ku-ce daga jama’a.
Gwamna Sule ya umarci a gudanar da bincike mai zurfi kan wannan al’amari, tare da kafa kwamitin mutum uku don gudanar da binciken. A taron da ya gudanar da mambobin hukumar TSC da sauran jami’an ma’aikatar ilimi, sun amince da cewa sun ɗauki malamai sama da 1,000 ba tare da izini ba.
Wannan lamari ya haifar da damuwa a tsakanin al’ummar jihar, yayin da gwamna ya jaddada cewa duk wani wanda aka samu da laifi a cikin wannan al’amari zai fuskanci hukunci.