Gwamnan jihar Kano, Abba Kabir Yusuf, ya sanar da tsawaita wa’adin aikin shugaban ma’aikatan gwamnatin jihar da wasu manyan sakatarori na shekaru biyu. Wannan mataki ya fara daga ranar 31 ga watan Disamba, 2024, kuma yana cikin wata dokar zartarwa da gwamnan ya rattaba hannu a kai.
A cikin sanarwar da daraktan yada labarai na ofishin shugaban ma’aikata, Aliyu Yusuf, ya fitar, an bayyana cewa tsawaita wa’adin aikin ya shafi manyan ma’aikatan gwamnatin jihar da suka hada da Alhaji Abdullahi Musa, wanda zai ci gaba da zama shugaban ma’aikatan gwamnati (HoS), da sauran sakatarori kamar Umar Muhammad Jalo da Bilkisu Shehu Maimota.
Haka kuma, gwamna ya tsawaita wa’adin aikin wasu kwararru a fannin kiwon lafiya da suka hada da Amina Idris da Ahmad Lawan. Wannan mataki na gwamna ya yi daidai da tanadin kundin tsarin mulkin tarayyar Najeriya na 1999, wanda ke bayar da damar tsawaita wa’adin aiki ga ma’aikata.
Gwamnan ya bayyana cewa wannan mataki yana nufin tabbatar da ci gaba da inganta ayyukan gwamnatin jihar da kuma samar da ingantaccen shugabanci a fannoni daban-daban na gudanarwa. Wannan sabuwar shawara na gwamna Abba Kabir Yusuf na zuwa ne a lokacin da ake fuskantar kalubale a fannin gudanar da harkokin gwamnati a jihar Kano.