Gwamnan jihar Kano, Abba Kabir Yusuf, ya kai ziyara ga gidajen gyaran hali a jihar, inda ya bayar da gudunmawar abinci da kayayyakin more rayuwa ga fursunoni.
Gwamna Abba ya bayar da tallafin a cibiyoyi guda uku, ciki har da Kurmawa, Janguza, da Goron-Dutse. Wannan mataki na gwamnati na nufin kyautata rayuwar fursunonin da ke cikin gidajen gyaran hali.
A yayin gabatar da tallafin, Hon. Adamu Aliyu Kibiya, wanda ya wakilci gwamna, ya bayyana cewa wannan tallafi yana da nufin taimaka wa fursunoni su gyara rayuwarsu. Ya ce, “Gwamna Abba Kabir Yusuf na son kowa ya sami damar inganta rayuwarsa, har ma da waɗanda ke tsare.”
Tallafin ya haɗa da shanu biyar, buhu 300 na shinkafa, katifa 4000, da sauran kayayyaki kamar bargo, ruwan leda, da sabulun wanka. Gwamnan kuma ya sanar da shirin biyan basussukan fursunonin da ke da bashin da bai wuce Naira miliyan ɗaya ba.
Shugaban gidan gyaran hali na Kurmawa, DCCS Ibrahim Rambo, ya yi godiya ga gwamnatin bisa wannan tallafi, yana mai tabbatar da cewa za a yi amfani da kayan da aka bayar yadda ya kamata.
Wannan mataki na gwamnatin jihar Kano na nuni da kulawar da ake baiwa fursunoni da kuma kokarin kyautata musu rayuwa.