A ranar Talata, 20 ga watan Nuwamba, 2024, Gwamna Nasir Idris na jihar Kebbi ya kai ziyarar jaje ga al’ummar Fulani da aka kai wa hari a yankin Mera.
An kai wa al’ummar Fulani hari ne bayan wasu da ake zargin ‘yan ta’addar Lakurawa ne suka kashe mutane 17 a harin da suka kai kauyen Mera.
A yayin ziyarar da ya kai, Gwamna Nasir Idris ya gargadi mutane a kan kai farmakin daukar fansa, yana mai cewa gwamnatinsa ba za ta lamunta ba.
“Hare-haren daukar fansa na kai ga mutuwar yara, mata da kuma tsofaffi. Ko a lokacin yakin duniya, dokar kasa da kasa ta hana kashe yara, mata da dattawa.”
- A cewar gwamnan.
Gwamna Nasir Idris ya jaddada aniyar gwamnatinsa na kare dukiyoyi da rayukan al’umma tare da yin alkawarin sayo karin motocin sintiri ga jami’an tsaron jihar.
Ya kuma ba al’ummar Fulani tallafin N10m, yayin da ya ce zai aiko masu da kayayyakin tallafin domin rage radadin wannan farmaki.
Da ya ke jawabi a madadin al’ummar Fulanin, wani da harin ya shafa, Rugga Hor-e-Mera, ya ce mutane uku daga iyalansa aka kashe, wasu na kwance asibiti.
Ya ce a farmakin da aka kai masu, an kona masu bukkoki 183, sannan an kona amfanin gona da sauran kayayyakin amfanin yau da kullum.
Da yake wanke Fulani daga harin da aka kai garin Mera, Rugga ya ce shi ma ya fuskanci ta’addancin ‘yan bindiga a bara, inda suka tafi da shanunsa 80.
Wannan lamari ya jefa al’ummar yankin cikin tashin hankali, kuma ana ci gaba da bincike domin gano wadanda suka aikata wannan danyen aiki.
Muna kira ga al’umma da su kwantar da hankulansu, su kuma guji daukar fansa, domin hakan na iya kara jefa yankin cikin tashin hankali.
Muna kuma kira ga gwamnati da ta kara kaimi wajen kare rayuka da dukiyoyin al’umma, tare da tabbatar da an hukunta wadanda suka aikata wannan danyen aiki.