Gidauniyar Sameer Salihu ta kaddamar da aikin gina wani muhimmin titi da zai haɗa jihohin Kebbi da Sokoto a Arewacin Najeriya. Wannan aikin na da nufin gyara hanyar Kampani a ƙaramar hukumar Argungu, wanda zai sauƙaƙa wa matafiya da ke jigila a wannan yanki.
Shugaban Gidauniyar, Sameer Salihu Argungu, ya bayyana cewa wannan aikin ya zama wajibi don tallafawa aiki na gwamnatin jihar a ƙarƙashin jagorancin Gwamna Nasir Idris. A cewarsa, gidauniyar na da manufofi da suka haɗa da koyar da matasa sana’o’in hannu, bayar da jari, da kuma samar da hasken fitila mai amfani da hasken rana a yankunan.
Jami’in hulda da jama’a na gidauniyar, Ashiru Musa Argungu, ya tabbatar da cewa aikin gyaran hanyar ya fara, kuma yana da nufin inganta jin daɗin al’umma. Ya ce, “Akwai wata hanya da ta haɗa Sokoto zuwa Kebbi, kuma ruwan da ya yi kasan ya lalata wannan hanyar, don haka muka ɗauki nauyin gyaran ta.”
A cewar Ashiru, wannan aikin na daga cikin kokarin gidauniyar don rage nauyin da gwamnatin jihar ke fuskanta wajen inganta hanyoyin sufuri. Gidauniyar ta yi alkawarin ci gaba da tallafawa al’umma ta hanyoyi da dama, ciki har da ilimi da sana’o’i.
Aikin gina wannan titi zai taimaka wajen inganta harkokin kasuwanci da sufuri a tsakanin jihohin, yana mai da hankali kan bunkasa tattalin arzikin yankin.