A wata magana da ta jawo hankali a taron kwamitin zartarwa na kasa (NEC) na jam’iyyar APC da aka gudanar a Abuja, shugaban jam’iyyar, Dr. Abdullahi Umar Ganduje, ya bayyana cewa ya gaji bashin sama da Naira biliyan 8.9 lokacin da ya karɓi shugabancin jam’iyyar. Wannan bayanin ya kasance a gaban shugaba Bola Ahmed Tinubu da sauran manyan jiga-jigan jam’iyyar.
Ganduje, wanda tsohon gwamnan jihar Kano ne, ya bayyana cewa bashin da aka gada yana da alaƙa da shari’o’in da ke gudana a gaban kotu, wanda ya shafi zabukan da aka gudanar a baya. A cewarsa, “Kwamitin NWC ya gaji bashin Naira biliyan 8,987,874,663 wanda ya samo asali daga shari’o’i daban-daban da suka shafi zabuka.”
Ganduje ya nemi goyon bayan kwamitin NEC domin magance wannan matsala, yana mai cewa wasu asusun ajiyar jam’iyyar har yanzu suna kulle saboda wadannan basussukan. Ya roki kwamitin da ya kawo wa jam’iyyar APC ɗauka ta hanyar warware waɗannan basussuka da suka wa jam’iyyar katutu.
Taron ya samu halartar shugabannin jihohi, ministoci, da sauran jiga-jigan jam’iyyar, ciki har da mataimakin shugaban kasa Kashim Shettima, shugaban majalisar dattawa Godswill Akpabio, da kakakin majalisar wakilai Tajudeen Abbas. Wannan taro na NEC na da matuƙar muhimmanci wajen tsara hanyoyin da za a bi domin inganta harkokin jam’iyyar APC a Najeriya.
Ganduje ya bayyana cewa lauyan jam’iyyar na kasa, Prof. Abdul Kareem Kana (SAN), na kokarin rage nauyin bashin ta hanyar tattaunawa da amfani da hanyoyin warware matsaloli ba tare da shari’a ba. Wannan ya nuna cewa jam’iyyar na fuskantar kalubale da dama, wanda zai iya shafar matsayin ta a siyasar ƙasar nan.