Hukumar Yaki da Cin Hanci da Rashawa ta Najeriya (EFCC) ta sanar da cewa za ta sake gurfanar da tsohon mai ba shugaban ƙasa shawara kan harkokin tsaro, Kanal Sambo Dasuki, a gaban babbar kotun birnin tarayya a Abuja. Shari’ar ta biyo bayan zargin karkatar da kuɗin da suka kai N33.2bn.
Sambo Dasuki zai gurfana tare da tsohon babban manajan kamfanin NNPCL, Aminu Baba-Kusa, da wasu kamfanoni guda biyu, Acacia Holdings Limited da Reliance Referral Hospital Limited. Wannan shari’ar za ta kasance a gaban mai shari’a Charles Agbaza, bayan shari’ar ta dawo daga mai shari’a Hussein Baba-Yusuf.
Dasuki da wasu suna fuskantar tuhume-tuhume da suka shafi karkatar da kuɗaɗen da aka tanada don sayen makamai domin yaƙi da Boko Haram. A cikin shari’ar da ta gabata, an kira shaida guda ɗaya kacal, wanda hakan ya sa shari’ar ta ɗage. EFCC tana da hujjoji da dama kan wannan badakalar, kuma ana sa ran shari’ar za ta ci gaba da tafiya a gaban kotu.
Hukumar ta tabbatar da cewa za ta ci gaba da gudanar da bincike da kuma gurfanar da duk wadanda suka yi laifi a cikin wannan lamari.