Shugaban ma’aikatan gwamnatin Jihar Rivers, Edison Ehie, ya bayyana cewa an yi ƙoƙarin ba shi cin hanci na Naira biliyan 5 domin ya jagoranci tsige Gwamna Siminalayi Fubara. Wannan bayani ya fito ne yayin wata tattaunawa da ya yi a shirin Channels Television.
Ehie, wanda ya taba zama kakakin majalisar dokokin jihar, ya musanta zargin cewa yana da hannu a rushe ginin majalisar dokokin. Ya ce har yanzu yana da shaidar wannan tayin a cikin wayarsa, kuma ya riga ya fitar da takardun shaidar domin kare kansa daga duk wani yunkurin cutar da shi.
A cewar Ehie, an yi masa tayin kudin ne a watan Oktoban 2023 lokacin da yake shugabantar masu rinjaye a majalisar. Ya ce, “Ina da dukkan shaidu a cikin wayata. A farkon watan Oktoban 2023, an yi kokarin ba ni cin hancin Naira biliyan 5 domin in jagoranci tsige Gwamna Fubara.”
Baya ga batun cin hanci, Ehie ya musanta zargin da tsohon shugaban ma’aikatan Jihar Rivers, George Nwaeke, ya yi masa na cewa yana da hannu a rushe ginin majalisar. Nwaeke ya zargi Ehie da cewa Gwamna Fubara ne ya ba shi umarnin rusa majalisar a ranar 30 ga Oktoba, 2023.
Ehie ya bayyana cewa wannan zargi wani yunkuri ne na bata masa suna a siyasa, yana mai cewa ya umarci lauyoyinsa su shigar da kara kan Nwaeke saboda cin zarafi da bata suna. Wannan rikicin siyasa na ci gaba da ruruwa a Jihar Rivers, inda aka yi sabani tsakanin Gwamna Fubara da tsohon gwamna, Nyesom Wike.