Wani matashi dan jam’iyyar PDP daga jihar Kaduna mai suna Aliyu Kwarbai ya tura sako ga Sanata Ibrahim Khalid Soba, wanda ke wakiltar Kaduna ta Arewa a Majalisar Dattawa. Kwarbai ya roki sanatansa da ya ki amincewa da cire Gwamna Siminalayi Fubara daga kujerarsa a jihar Rivers.
A cikin sakon da Kwarbai ya wallafa a shafin X, ya bayyana cewa amincewa da cire gwamnan zai haifar da mummunar illa ga dimokuradiyya da zaman lafiya a jihar. Ya yi nuni da cewa hakan zai bar baya da kura, yana mai cewa ya goyi bayan Sanata Soba a lokacin yakin neman zabe, amma ba ya taba neman wani abu a wajensa.
Kwarbai ya ce: “A matsayina na ɗan jam’iyyar PDP, na ba da gudunmawa wurin yakin neman zabenka, kuma na san halin da ake ciki. Ina rokon ka da ka tsaya tsayin daka wajen kare dimokuradiyya.”
Masu amfani da kafar X sun bayyana ra’ayoyinsu kan wannan sako, suna nuna goyon baya ga Kwarbai da kuma nuna damuwa game da matakin cire gwamna Fubara. Wasu sun yi kira ga sanatocin su kula da hakkin dimokuradiyya a cikin wannan lamari.
Wannan bukata ta Kwarbai ta jawo hankalin al’ummar jihar, inda ake sa ran ganin yadda wannan yunkuri zai shafi harkokin siyasa da zaman lafiya a jihar Rivers da Kaduna.