Jumma’a, Nuwamba 29, 2024 — Kasar Chadi ta sanar da yanke alaƙar soji da Faransa, bayan shekaru da dama na hadin gwiwa da kasashen yammacin duniya. Wannan mataki na yanke alaƙa ya zo ne a lokacin da Chadi ke fuskantar kalubale na tsaro da kuma bukatar sabbin hanyoyi na magance matsalolin da ke addabar ta.
Ministan harkokin wajen Chadi, Abderaman Koulamallah, ya tabbatar da wannan mataki a cikin wata sanarwa da aka wallafa a shafin su na Facebook. Koulamallah ya bayyana cewa, “Kasar Chadi ta yanke alaƙar soji da Faransa ne domin sake nazarin hulɗarta da kasashen ketare.” Ya kara da cewa, “Bayan shekaru 66 da samun yanci, Chadi na bukatar ta tsayu da kafafunta tare da samun cikakken iko kan dakarunta.”
Yanke alaƙar soji da Faransa yana nufin cewa sojojin Faransa da suka kai kimanin 1,000 a Chadi, tare da wasu kayan yaki, za su fice daga kasar. Wannan yana nuni da cewa Chadi na kokarin tabbatar da cikakken ‘yancin kai a harkokin tsaronta. A cikin sanarwar, Koulamallah ya ce, “Faransa ta kasance ƙawa a gare mu, amma lokaci ya yi da za mu raba hanya a kan abin da ya shafi tsaro.”
Bayan yanke alaƙar da Faransa, Chadi na neman haɗa kai da ƙasar Rasha. Wannan mataki na nuni da canjin ra’ayi a harkokin kasashen waje na Chadi, musamman ma a lokacin da ƙasar ke fuskantar matsaloli na tsaro daga kungiyoyin ta’addanci kamar Boko Haram. Kasar Rasha ta dade tana neman karfafa alaka da kasashen Afirka, kuma wannan sabon mataki na Chadi na iya jawo hankalin Rasha wajen bayar da goyon baya.
Yanke alaƙar soji da Faransa da shirin haɗa kai da Rasha na nuna sabuwar hanya a harkokin kasashen waje na Chadi. Wannan canji yana da mahimmanci ga harkokin siyasa da tsaro na yankin, musamman ma a cikin wannan lokaci na canje-canje a duniya. Al’ummar Chadi na fatan wannan mataki zai kawo ci gaba da zaman lafiya a ƙasar, tare da tabbatar da cewa suna da cikakken iko kan harkokin tsaronsu.