Bayan janye hawan sallah da Aminu Ado ya yi, gwamnatin Jihar Kano ta sanar da canje-canje a tsare-tsaren ranar jajibirin sallah. Kwamishinan mahalli da sauyin yanayi, Dr. Ɗahir H. Hashim, ya bayyana cewa an sassauta dokar taƙaita zirga-zirga a ranar Asabar, 29 ga watan Maris, 2025.
Gwamnatin ta yanke wannan shawara ne domin bai wa al’umma damar gudanar da shirye-shiryen ƙaramar sallah cikin kwanciyar hankali. Duk da haka, gwamnatin ta bukaci al’ummar Kano da su ci gaba da tsaftace muhalli don tabbatar da gudanar da bukukuwan Sallah cikin tsafta da lafiya.
Dr. Hashim ya ce, “Muna kira ga jama’a da su tsaftace gidajensu da unguwanni, domin mu yi bukukuwan Sallah a cikin yanayi mai kyau.” Hakanan, gwamnatin ta tabbatar da cewa aikin tsaftace muhalli a kasuwanni da ma’aikatu zai ci gaba kamar yadda aka saba.
Gwamnatin Kano ta yi addu’a da fatan alheri ga al’umma, tana mai roƙon Allah ya karɓi ibadun da aka gudanar a watan Ramadan, kuma ya sa a gudanar da bukukuwan Sallah cikin lumana da kwanciyar hankali.