Ministan tsaron Najeriya, Bello Matawalle, ya bayar da tallafin Naira miliyan 500 ga magoya bayan jam’iyyar APC a jihar Zamfara domin sauƙaƙa musu azumin watan Ramadan. Wannan tallafin ya zo ne a lokacin da wasu ‘yan siyasa suka raba hatsi a jihar.
A wata tattaunawa da manema labarai, mai taimaka wa ministan, Ibrahim Danmaliki Gidan-Goga, ya bayyana cewa an yi sabon salo wajen raba kudin maimakon kayan abinci, domin mutane su saye abubuwan da suka fi bukata a azumi.
Gidan-Goga ya ce kashi 80% na mutanen da aka yi niyyar ba tallafin sun riga sun karɓi kuɗin da aka ware musu. Ya kara da cewa, mutane 200 daga kowanne daga cikin ƙananan hukumomi 14 na jihar sun samu N100,000, wanda gabaɗaya ya kai Naira miliyan 280.
Haka zalika, manyan jiga-jigan APC guda 24 daga ƙananan hukumomi biyar sun samu N250,000, yayin da jiga-jigan APC guda 90 daga ƙananan hukumomi tara na yankunan Zamfara ta Tsakiya da Arewa sun samu N50,000.
Gidan-Goga ya yi kira ga wadanda suka amfana da tallafin Ramadan da su ci gaba da yi wa Najeriya addu’ar zaman lafiya da ci gaba. An kuma sanar da cewa, har yanzu wasu yankuna ba su karɓi tallafinsu ba saboda jinkirin mika jerin sunayen wadanda za su amfana.
Wannan sabon tsarin raba tallafin ya jawo hankulan mutane da dama, inda ake fatan zai inganta rayuwar masu karamin karfi a jihar Zamfara a wannan lokacin na azumin Ramadan.