A yayin da ake ta tattaunawa kan kafa kotunan Shari’a a Kudu maso Yamma, fitaccen basarake, Oba Abdulrasheed Akanbi, Sarkin Iwo a jihar Osun, ya bayyana goyon bayansa ga wannan shiri. Ya ce babu wata gwamnati da za ta iya hana Musulmai a wannan yanki amfani da dokar Shari’a.
Oba Akanbi ya jaddada cewa dokar Shari’a ta kasance cikin tsarin al’adar Musulmai a Kudu maso Yamma fiye da shekara goma. A wata hira da ya yi da jaridar The Punch, ya bayyana cewa kafa kotunan Shari’a yana da alaka da addini da al’adun Musulmai.
Ya ce: “Wannan ‘yancin an tabbatar da shi a tsarin mulkin Najeriya, kuma yana cikin ‘yancin addini da kundin tsarin mulki ya ba kowanne dan kasa.” Haka zalika, ya kawo misalai na bankunan Shari’a da kwalejin Shari’a da ke Iwo, inda ya ce suna tabbatar da cewa rayuwar Musulmai ta samu kulawa ta musamman.
Oba Akanbi ya kuma bayyana cewa dokar Shari’a ta fi mayar da hankali kan batutuwan gado, aure, da saki na Musulmai. Ya yi nuni da cewa wannan ‘yancin Musulmai ne su zaɓi dokokin gargajiya ko na kotun gwamnati.
Har ila yau, Oba Akanbi ya jaddada cewa dokar Shari’a ba ta shafi mabiya wasu addinai ba. Ya ce: “Duk wanda ya ji yana son Shari’a, sai ya musulunta, ko Musulmi yana da ‘yancin canzawa zuwa Kiristanci.”
A karshe, an dage shirin kafa kotunan Shari’a da kungiyar Musulmin jihar Oyo ta shirya, wanda aka sa ran za a kaddamar a ranar 11 ga watan Janairu, 2025, saboda korafe-korafen da aka samu daga wasu mutane.