A jihar Nasarawa, bankuna sun sanar da cewa sun rage yawan kuɗin da abokan huldarsu za su iya cirewa a banki zuwa N10,000, yayin da yawan kuɗin da za a cire daga na’urorin ATM ya tsaya a N20,000. Wannan sabon tsarin ya jawo damuwa da fargaba a tsakanin jama’a, wanda ke fuskantar matsaloli wajen samun kuɗi.
Ma’aikatan bankuna sun bayyana cewa wannan mataki na rage yawan cire kuɗi ya samo asali ne daga karancin takardun kuɗi a ma’ajiyar su. Wani ma’aikacin banki ya shaida wa manema labarai cewa: “Ba mu da isasshen kuɗi, muna raba abin da muke da shi ne a tsakanin abokan huldar mu.”
Duk da cewa bankunan ba su rage kuɗin da za a iya cirewa daga ATM ba, wannan takaitaccen tsarin ya jefa jama’a cikin wahala, musamman ga wadanda ke bukatar kuɗi don biyan bukatu na gaggawa. Wasu abokan huldar bankunan sun nuna rashin jin daɗinsu kan wannan sabuwar dokar, suna mai cewa tana kawo musu matsaloli da dama.
Haka kuma, masu sana’ar POS sun amfani da wannan yanayin, inda suka karu da farashin cajin cire kuɗi. Ana caji tsakanin N200 zuwa N250 don cire N5,000, yayin da aka karɓi N400 don cire N10,000. Wannan yanayin na caji mai tsada na haifar da karin damuwa ga jama’a, wanda ke bukatar kuɗi a kowane lokaci.
Jama’a suna kira ga gwamnati da ta dauki mataki na gaggawa domin kawo karshen wannan matsala ta karancin kuɗi, da kuma tabbatar da cewa akwai isasshen kuɗi a cikin bankunan don sauƙaƙe wa jama’a samun kuɗi a lokutan bukata. Wannan lamari ya jefa jama’a cikin mawuyacin hali, musamman a wannan lokacin na Kirsimeti, inda ake bukatar kuɗi mai yawa don gudanar da bukukuwan.