Babajimi Benson, ɗan majalisar wakilan Najeriya daga jihar Legas, ya bayyana ra’ayinsa kan yadda za a magance matsalar rashin tsaro da ake fama da ita a ƙasar. A wata hira da ya yi da jaridar The Punch, Benson ya nuna cewa samar da ‘yancin cin gashin kai ga ƙananan hukumomi zai iya zama hanya mafi inganci.
Benson ya ce ƙananan hukumomi suna da matuƙar muhimmanci wajen aiwatar da hanyoyin magance matsalolin tsaro a matakin farko. Ya bayyana cewa, idan aka ba su ikon gudanar da harkokin kuɗi da gudanarwa, za su fi dacewa wajen tara bayanai da gudanar da shirin tsaro da ya dace.
“Ƙin aiwatar da tsarin ‘yancin cin gashin kai na ƙananan hukumomi yana daga cikin abubuwan da ke ƙara ta’azzara matsalar tsaro,” in ji Benson. Ya ƙara da cewa, ƙananan hukumomi su ne mafi kusa da talakawa, kuma suna da hanyoyin da za su taimaka wajen rage tasirin ta’addanci.
Benson ya yi kira ga hukumomi da su ba da goyon baya ga ƙananan hukumomi ta fannin kuɗi da gudanarwa, don inganta tsaro a cikin gida. Wannan mataki, a cewarsa, zai taimaka wajen sauya tunanin matasa daga shiga harkokin ta’addanci, tare da samar da ayyukan yi da tallafawa masu sana’o’i.