Shugaban ECK Foundation, Dr. Emeka Kalu, ya bayyana cewa Najeriya na bukatar Alhaji Atiku Abubakar a matsayin shugaban kasa domin kawo gyara ga tattalin arzikin ƙasar. Kalu ya bayyana cewa Atiku yana da cikakken tarihin shugabanci da zai taimaka wajen ceto Najeriya daga halin da take ciki.
A cikin wata sanarwa da ya fitar, Kalu ya yi tsokaci kan matsalolin tattalin arziki da Najeriya ke fuskanta, yana mai cewa Atiku ne kadai ke da ƙarfin hali na magance wadannan matsaloli idan aka zabe shi a shekarar 2027. Ya yi kira ga ‘yan Najeriya da su duba albarkatun ƙasa yadda ya kamata domin bunkasa tattalin arzikin ƙasar.
Dr. Kalu ya ce halin da Najeriya ke ciki na bukatar shugabanci mai inganci da ke da hangen nesa. Ya jaddada cewa, don samun ci gaba, akwai bukatar a zabi shugabanni masu kishin ƙasa da suka cancanta, wadanda zasu iya kawo canje-canje masu ma’ana a ƙasar.
Hakanan, Kalu ya yi wa gwamnatin yanzu suka kan yadda ba ta yi nasara wajen magance matsalolin da suka addabi ƙasar, ciki har da karuwar yunwa da rashin tsaro. Ya kara da cewa, goyon bayan Atiku zai taimaka wajen dawo da Najeriya kan hanya mai kyau tare da inganta rayuwar al’umma.