A cikin wani sabon ci gaba a siyasance a jihar Osun, magoya bayan tsohon gwamna, Adegboyega Oyetola, sun fara rokon shi da ya dawo ya sake neman takarar gwamna a zaben 2026. A halin yanzu, Oyetola yana matsayin ministan kula da harkokin tattalin arzikin ruwa a gwamnatin Bola Tinubu, bayan ya sha kaye a zaɓen da aka gudanar a shekarar 2022.
Kungiyar IPSC, wacce ta kunshi mambobin jam’iyyar APC a jihar Osun, ta bayyana cewa Oyetola ne kadai wanda zai iya tsayawa takara a wannan zabe mai zuwa. A yayin taron manema labarai da kungiyar ta gudanar a Osogbo, shugaban kungiyar, Dr. Adeyoola Adejare, ya bayyana cewa Oyetola yana da gogewar da ta dace da bukatun jihar, musamman a fannin gudanar da gwamnati da kuma inganta harkokin kudi.
Dr. Adejare ya jaddada cewa, “Gogewar Oyetola wajen gudanar da harkokin kudi cikin gaskiya da riƙon amana tare da tsare-tsare masu kyau kaɗai za su ba shi nasara a zaɓen gwamnan Osun na 2026.” Ya kuma bayyana cewa idan Oyetola ya ƙi amincewa da kiran da magoya bayansa ke yi, hakan na iya haifar da rikici da rarrabuwar kai a jam’iyyar APC, wanda zai jawo cikas ga nasarar jam’iyyar a zaben.
A halin yanzu, Oyetola yana da tasiri sosai a cikin jam’iyyar APC a jihar Osun, kasancewar ya kasance jagora wanda ke da kyakkyawar alaƙa da masu ruwa da tsaki a jam’iyyar. Magoya bayan sun bayyana cewa, idan ya amsa kiran su ya koma ya tsaya takara, ba zai sami wani hamayya ba a cikin jam’iyyar, saboda yana da karbuwa a tsakanin mambobin jam’iyyar da ma al’ummar jihar.
Akwai hasashen cewa idan Oyetola ya yarda ya sake tsayawa takara, zai kawo sabon salo a cikin harkokin gudanarwa da kuma inganta alaƙa tsakanin gwamnatin jihar da al’umma.
A karshe, Oyetola na fuskantar babban zabi a gaban sa, inda rokon da ake yi masa daga magoya bayansa zai iya zama wata hanya ta dawo da shi a fagen siyasa, ko da yake yana matsayin minista a yanzu. Wannan yanayi na iya zama mai tasiri a kan makomar jam’iyyar APC a jihar Osun a zaben 2026.