Rundunar Sojojin Najeriya ta dakile wani hari da ‘yan bindiga suka shirya kaiwa a Kudancin Jihar Taraba. A yayin wannan samame, sojojin sun kama mutane biyu, Terry Waapara da Tobaya Tekura, dauke da bindigogin AK-47 da tarin harsasai.
An samu nasarar ne ta hanyar samun bayanan sirri, wanda ya kai ga aiwatar da sintiri da wasu ayyukan soji a yankin. A ranar 11 ga Disamba, 2024, sojojin sun yi gaggawar daukar matakan dakile shirin ‘yan ta’addar bayan samun labarin shirin kai hari a kasuwa.
A yayin farmakin, an kama Terry Waapara da Tobaya Tekura a kauyen Adu yayin da suke kokarin shiga kasuwar Chachanji. Rahotanni sun nuna cewa suna shirin aiwatar da ta’addanci a kasuwar, ciki har da garkuwa da mutane.
Rundunar sojin ta bayyana cewa an kwace bindigogi guda biyu da tarin harsasai daga hannun ‘yan ta’addar. Yanzu haka, wadanda aka kama suna hannun hukumomi, inda ake ci gaba da bincike domin gano sauran miyagun da ke aiki tare da su.
Wannan nasara ta nuna kokarin sojojin Najeriya na inganta tsaro a yankin, tare da jan hankali ga al’umma game da bayar da bayanai masu amfani domin dakile ayyukan ta’addanci.