Rundunar ‘yan sandan jihar Kano ta bayyana cewa an kama mutum 41 da ake zargi da hannu a kisan DPO na Rano, CSP Baba Ali, wanda aka kashe yayin da yake bakin aikinsa. Wannan lamari ya girgiza jami’an tsaro da al’umma baki ɗaya.
Kwamishinan ‘yan sanda, CP Ibrahim Bakori, ya tabbatar da cewa za a hukunta duk wanda aka samu da laifi a cikin wannan danyen aiki. An gudanar da bincike cikin gaggawa wanda ya kai ga cafke mutanen da aka zarga da aikata kisan.
SP Abdullahi Haruna Kiyawa ya bayyana cewa rundunar ta tura jami’anta na musamman domin gudanar da binciken. Ya jaddada cewa suna aiki tuƙuru don tabbatar da cewa babu wanda zai tsira daga hukunci.
Wannan kisa ya zama barazana ga aikin ‘yan sanda na kare rayuka da dukiyoyin jama’a. Rundunar ta yi alkawarin ci gaba da kare tsaro a jihar, tare da rokon al’umma su ci gaba da bayar da hadin kai.
An karrama marigayi CSP Baba Ali bisa ga sadaukarwarsa da jarumtaka a yayin gudanar da aikinsa.